FH gekk í gær frá kaupum á þeim Davíð Snæ Jóhannssyni og Lasse Petry. Sá fyrrnefndi kemur frá Lecce og sá síðarnefndi frá HB Köge. Petry hefur áður leikið hér heima, þá með Val. Þá lék Davíð Snær með Keflavík áður en hann hélt til Ítalíu.

Leikmennirnir voru í viðtali við heimasíðu FH í dag.

„Ég er virkilega sáttur með að vera mættur í Kaplakrika. Hér er mikill metnaður, frábær aðstaða og ég tel þetta vera mjög góðan stað til að bæta sig sem leikmaður og einstaklingur,“ sagði Davíð Snær. Hann lék sinn fyrsta leik með FH gegn Val í gær. Leiknum lauk 2-2. „Ég lít björtum augum á framtíðina hérna hjá FH, hér er verið að slípa saman lið sem er góð blanda af ungum og reyndari leikmönnum sem hafa allir það markmið að færa heim bikara í Kaplakrika. Ég mun leggja mitt á vogaskálarnar með mínum styrkleikum. Áfram FH!“

Petry kveðst sömuleiðis afar glaður með að vera kominn í FH. Miðjumaðurinn sækist eftir meiri spiltíma en í Danmörku. ,,Ég var ekki búin að vera að byrja marga leiki hjá mínu gamla liði, þannig þegar Óli og Davíð hringdu í mig sá ég þetta sem stórt tækifæri að spila í mjög góðu liði með mörgum góðum leikmönnum og þjálförum. Lukkulega hefur fjölskyldan mín alltaf staðið við bakið á mér og þetta var aldrei spurning. FH er stórt félag á Íslandi sem á skilið að vera við toppinn, svo vonandi get ég hjálpað til að ná í sigra og það byrjar á miðvikudaginn. Ég get ekki beðið eftir að byrja og allir hjá félaginu hafa tekið vel á móti mér. Þannig ég er mjög ánægður hér og tilbúinn að gera allt fyrir félagið“