Kjartan Henry Finnbogason, leikmaður KR og fyrrum atvinnumaður í knattspyrnu, kann vel við sig í knattspyrnulýsingum. Hann hefur lýst þó nokkrum leikjum á Viaplay ásamt reynsluboltanum Herði Magnússyni. Kjartan ræddi þetta nýja hlutverk sitt í þættinum Íþróttavikan með Benna Bó á Hringbraut í gær.

,,Mér finnst það mjög skemmtilegt. Mér finnst bara skemmtilegt að horfa á góðan fótbolta. Þetta er eitthvað sem mann langar að prófa og hef bara mjög gaman að, sérstaklega þegar maður er að vinna með toppmönnum eins og Hödda Magg,“ sagði Kjartan.

En þó Kjartan og Hörður vinni vel saman í dag hefur ekki alltaf verið gott á milli þeirra. Hörður stýrði þáttunum Pepsi-mörkin á Stöð 2 Sport þegar Kjartan gagnrýndi þáttinn harðlega og taldi hann hafa breytt viðhorfi fólks á sér.

,,Eftir að einn þáttur af Pepsi-mörkunum fyrir tveimur árum síðan fór að dæma mig sem hrotta og óþverra og sama óviljaverkið endurtekið sex eða sjö sinnum finnst mér viðhorfið gagnvart mér verið leiðinlegt,“ sagði Kjartan í viðtali við Stöð 2 Sport árið 2014.

Kjartan og Hörður virðast þó búnir að leggja þetta að baki og vinna þeir vel saman í dag.

,,Árin eru búin að lækna þau sár. Þetta er svolítið íslenskt og kannski smá kaldhæðnislegt að við séum núna komnir í sama lið,“ sagði Kjartan í Íþróttavikunni með Benna Bó.

Hér að neðan má svo sjá þáttinn í heild sinni.