Mino Raiola, umboðsmaður nokkurra af helstu knattspyrnustjörnum heimsins var þann 12. janúar síðastliðinn lagður inn á gjörgæsludeild San Raffaele spítalans á Ítalíu sökum þess að ástand hans hafði versnað eftir að hann greindist með lungnabólgu.
Sagt er frá málinu á þýska vefmiðlinum BILD en þar segir að Raiola hafði verið lagður inn með alvarlega lungnabólgu en að ástand hans sé eins og er stöðugt og að hann sé að ná fyrri kröftum á ný.
Raiola er einn þekktasti umboðsmaður knattspyrnuheimsins. Hann er með leikmenn á borð við Paul Pogba á snærum sínum og er óhræddur við að hrista upp í hlutunum með vafasömum eða villandi yfirlýsingum um sína leikmenn.