Spánverjinn Rafa Benítez, var í gær rekinn úr starfi knattspyrnustjóra Everton eftir afleitt gengi liðsins í ensku úrvalsdeildinni. Síðasti naglinn í kistu Benitez reyndist 2-1 tap gegn fallbaráttuliði Norwich.
Ráðning Benitez reyndist umdeild alveg frá byrjun sökum tengsla hans við erkifjendur liðsins í Liverpool, verkefnið virtist dæmt til glötunar frá fyrstu stundu.
Nú er svo komið að forráðamenn Everton þurfa að finna annan knattspyrnustjóra til að taka við. Wayne Rooney, fyrrum leikmaður liðsins og núverandi knattspyrnustjóri Derby County, hefur þar verið nefndur á nafn.
Rooney hefur gert góða hluti við afar erfiðar fjárhagslegar aðstæður Derby sem hefur meðal annars þurft að sætta sig við að láta taka stig af sér í ensku B-deildinni.
Annað kunnulegt andlit er orðað við liðið en fyrrum knattspyrnustjóri liðsins, Roberto Martinez, landsliðsþjálfari Belgíu er orðaður við endurkomu á Goodison Park.
Þá hafa Duncan Ferguson, aðstoðarmaður Benitez, Graham Potter, knattspyrnustjóri Brighton, Frank Lampard, fyrrum knattspyrnustjóri Chelsea og Nuno Espirito Santo, fyrrum knattspyrnustjóri Tottenham einnig verið orðaðir við stöðuna.
Everton situr um þessar mundir í 16. sæti ensku úrvalsdeildarinnar með 19 stig eftir 19 leiki.
Enski boltinn á 433 er í boði 
