Arnar Þór Viðarsson landsliðsþjálfari Íslands segir að leikmenn liðsins hafi orðið fyrir áreiti og kallað á þá að þeir væru nauðgarar. Um er að ræða tvö atvik eitt átti sér stað á æfingu liðsins í Safamýri á fimmtudag og aftur í göngutúr liðsins í dag.
Mikil umræða hefur verið um KSÍ síðustu vikurnar og féll stjórnin og formaðurinn sagði af sér. Sambandið hefur verið sakað um að hylma yfir meint kynferðisbrot.
Arnar sagði frá atvikinu eftir 2-2 jafntefli gegn Norður-Makedóníu á heimavelli í undankeppni HM í dag..
„Til að setja hlutina í samhengi, talandi um spennustig. Okkur langar að gefa ykkur eitt dæmi hvað þetta er oft erfitt fyrir þessa drengi. Að finna stuðning og búa til stuðning fyrir liðið. Þá er íslenska karlalandsliðið í göngutúr á leikdegi á heimavelli í Reykjavík og þeir þurfa að sitja undir því að kallað sé á þá nauðgarar, nauðgarar. Fjölskyldumenn og ungir drengir, þetta er erfitt,“ sagði Arnar Þór sem var miður sín vegna málsins og mátti heyra það í rödd hans.
Arnar vill ekki kenna þessu um slaka frammistöðu liðsins, hann vill að samtalið hjá þjóðinni haldi áfram um málefni líðandi stundar.
„Ekki misskilja mig, ég er ekki að henda þesari frammistöðu á þetta. Eina sem ég er að segja að við sem samfélag verðum að taka á þessu saman. Við erum að öskra á hvort annað, ég er að reyna og við erum að reyna að stýra íslenska landsliðinu í fótbolta.“
Landsliðið hefur staðið í stormi innan sem utan vallar síðustu daga en liðið sýndi karakter með því að koma til baka gegn Makedóníu í dag. Leikurinn endaði með 2-2 jafntefli eftir að hafa verið tveimur mörkum undir.
Arnar hefur staðið í stormi með liðið síðustu daga en hefur ekki íhugað að segja upp. „Ég sagði það í síðustu viku að við höfum ekki íhuga það, allir í staffinu teljum það að það sé ábyrgð hjá okkur. Þó ég sé að tala um þessa leiðinlegu hluti, þetta er ógeðslega gaman. Við erum stoltir af því að vera hérna með þessu liði, okkar ábyrgð að taka þetta lengra. Verkefnið hefur ekki verið auðvelt, við höfum ekki íhugað að segja af okkur,“ sagði Arnar.
Arnar hefur kallað eftir ramma utan um þau mál þegar verið er að velja landsliðshópinn. „Við verðum að fá ramma, annars er erfitt að velja hópinn. Þessi rammi þarf að koma sem fyrst. Hann þarf ekki að koma á morgun, það er voðalega erfitt að velja landsliðshóp og vita ekki í rauninni hverja þú mátt velja,“ sagði Arnar.
Arnar hélt svo áfram og sagði. „Ég er ekki að gera lítið úr einu né neinu máli, ég er ekki að segja að það þurfi ekki að taka á þessu og við eigum að tala um þessi mál. Tölum um þau saman og hættum að öskra á hvort annað.“