Birkir Már Sævarsson lék sinn 100. landsleik fyrir íslenska A-landsliðið í 2-2 jafntefli gegn Norður-Makedóníu í dag. Leikurinn var liður í undankeppni Heimsmeistaramótsins 2022.
Það gekk lítið sem ekkert upp hjá íslenska liðinu stærstan hluta leiksins. Þeim tókst þó að breyta 0-2 stöðu í 2-2 jafntefli með miklum karakter síðasta stundarfjórðung leiksins.
Brynjar Ingi Bjarnason og Andri Lucas Guðjohnsen skoruðu mörkin.
,,Framan af lélegur leikur hjá okkur. Síðustu 20-30 mínútur voru fínar. Varamennirnir komu inn með hellings kraft, frábært að menn komi inn og gefi svona af sér,“ sagði Birkir við RÚV eftir leik.
Eins og flestum er kunnugt hefur karlalandsliðið og Knattspyrnusamband Íslands verið í brennidepli undanfarið vegna meintra kynferðisafbrotamála landsliðsmanna og þöggunar innan sambandsins í tengslum við þau. Birkir var spurður út í það hvernig hafi verið að koma inn í yfirstandandi landsliðsverkefni eftir umræðuna undanfarið.
,,Ótrúlega þung stemmning yfir öllu samfélaginu. En það er alltaf gaman að koma í landsliðið og spila leiki. Ég er ótrúlegur stoltur af því að fá að vera partur af þessu alltaf.“
,,Þetta var frábær karakter sem liðið sýndi. Þetta leit ekkert sérstaklega út eftir að þeir skora seinna markið. Eins og ég segi, frábær innkoma hjá varamönnunum og við stigum upp í lokin og gerðum það vel,“ sagði Birkir að lokum.
