Ásmundur Arnarsson, þjálfari karlaliðs Fjölnis, mun yfirgefa félagið þegar samningur hans rennur út að tímabilinu loknu. Félagið hefur staðfest þetta.
Ási hefur stýrt Lengjudeildarliði Fjölnis samfleytt frá árinu 2018. Þar áður stýrði hann liðinu á árunum 2005 til 2011.
Hann hefur tvisvar sinnum farið með Fjölni upp í efstu deild sem og tvisvar í bikarúrslit.
Fjölnir er í fjórða sæti Lengjudeildarinnar sem stendur. Þrjár umferðir eru eftir og á liðið ekki raunhæfan möguleika á að komast upp í efstu deild.
Yfirlýsing Fjölnis
Knattspyrnudeild Fjölnis og Ásmundur Arnarsson hafa tekið þá ákvörðun um að framlengja ekki samstarfinu áfram að tímabili loknu.
Ási, eins og við þekkjum hann best, hefur skipað stóran sess í sögu Fjölnis þar sem hann hefur verið tvisvar aðalþjálfari meistaraflokks karla, eða í samtals 10 ár af rúmri 30 ára sögu félagsins. Undir hans stjórn afrekaði liðið að fara tvisvar upp í efstu deild og tvisvar í bikarúrslit.
Ási hefur reynst félaginu vel og skilur við liðið á góðum stað. Þrátt fyrir fall úr efstu deild á síðasta tímabili og erfiðar aðstæður á tímum heimsfaraldurs er margt jákvætt sem við tökum frá samstarfinu. Ungir leikmenn hafa fengið tækifæri undir hans stjórn og sumir hverjir jafnvel elt drauma sína í atvinnumennsku í kjölfarið.
Knattspyrnudeild Fjölnis þakkar Ása kærlega fyrir hans störf í þágu félagsins um leið og við óskum honum alls hins besta í öllu því sem hann mun taka sér fyrir hendur í framtíðinni.