Thomas Mikkelsen fyrrum framherji Breiðabliks hefur skrifað undir samning við Kolding í heimalandi sínu Danmörku.
Kolding leikur í þriðju efstu deild, Mikkelsen óskaði eftir því að rifta samningi sínum við Breiðablik í síðustu viku. Persónulegar ástæður voru fyrir því en Kolding krækti í Mikkelsen sem skoraði 63 mörk í 84 leikjum fyrir Breiðablik.
Breiðablik vann góðan sigur á Stjörnunni á mánudag en liðið er komið í harða titilbaráttu við Val, Víking og KA og verður mikil spenna fram eftir móti.
„Það er ekki tilviljun að Óskar Hrafn varð þjálfari ársins fyrir tveimur árum með Gróttu, hann kann eitthvað fyrir sér. Er hann ekki að drilla þetta lið í drasl,“ sagði Benedikt Bóas Hinriksson blaðamaður á Fréttablaðinu í sjónvarpsþætti okkar á Hringbraut í gær.
Mikkelsen kvaddi Breiðablik eftir leikinn en hann hefur reynst félaginu happafengur. „Ég veit það ekki, hann er í raun varamaður hjá Óskari. Mikkelsen er eitt besta vopn íslenska fótboltans, hann og Patrick Pedersen hafa síðustu ár verið bestu framherjarnir. Maður sá strax að það er ástæða fyrir því að hann er kallaður Mikki refur,“ sagði Benedikt.
Mikkelsen kvaddi Breiðablik vegna persónulegra ástæðna og þrátt fyrir að Benedikt viti þær þá vill hann ekki gefa allt upp.
„Gamli Séð og Heyrt blaðamaðurinn kannaði þetta aðeins: Þetta skekur Kópavoginn, þessar ástæður. Ég veit ekki hvort þeir eigi að halda honum, ef þetta er þannig að hann vill fara. Þá er þetta búið, ef hausinn er farinn,“ sagði Benedikt sem hefur starfað víða í fjölmiðlum og notið vinsælda.
Mikkelsen kvaddi Breiðablik í viðtali á Stöð2 Sport eftir leikinn og lofaði því að spila aldrei fyrir annað félag á Íslandi. „Hann talaði mjög fallega um Breiðablik, að famður Blika sé hlýr. Það er semi áhorfendabann og hann þarf að kveðja á útivelli, fallegt af honum koma í viðtal og segja þetta svona.“