Líklegt þykir að miðvörðurinn Jules Kounde, hjá Sevilla, muni ganga til liðs við Chelsea á næstunni. Nú hefur Fabrizio Romano greint frá því að Kurt Zouma, miðvörður Chelsea, gæti farið til spænska félagsins á móti sem hluti af kaupverðinu.
Talið er að Kounde hafi þegar náð samkomulagi við Chelsea um eigin kjör. Hvort að skiptin gangi í gegn sé því í höndum félaganna tveggja.
Kounde er 22 ára gamall Frakki. Hann hefur verið hjá Sevilla undanfarin tvö ár. Hann þykir virkilega spennandi leikmaður.
Hann mun skrifa undir samning við Chelsea til ársins 2026, nái félögin saman.
Zouma er 26 ára gamall Frakki. Hann hefur verið í herbúðum Chelsea frá árinu 2014.