Kórdrengir hafa fengið Alex Frey Hilmarsson lánaðan til félagsins fyrir seinni hluta leiktíðarinnar í Lengjudeildinni. Alex Freyr er 28 ára gamall og kemur frá KR.
Hann er miðjumaður sem hefur verið í herbúðum KR frá árinu 2019. Á yfirstandandi leiktíð hefur Alex Freyr leikið níu leiki með Vesturbæjarliðinu.
Kórdrengir eru í hörkutoppbaráttu í Lengjudeildinni. Liðið er 4 stigum á eftir ÍBV, sem er í öðru sæti, ásamt því að eiga leik til góða.
Uppgangur Kórdrengja síðustu ár hefur verið magnaður. Liðið var í 4. deild árið 2018 en hefur spænt sig upp deildarkerfið síðan þá.
