Það hefur lítið gengið upp hjá Stjörnunni í Pepsi Max-deild karla á þessari leiktíð. Liðið var rætt í hlaðvarpsþættinum Dr. Football í gærkvöldi þar sem mönnum fannst Þorvaldur Örlygsson, þjálfari liðsins, virka ansi þreyttur á stöðunni.
Stjarnan er í tíunda sæti deildarinnar með 13 stig eftir jafnmarga leiki. Liðið er 3 stigum fyrir ofan fallsæti.
Í síðustu umferð tapaði Stjarnan svo 2-0 gegn nýliðum Leiknis. Þar var síðarnefnda liðið mun betri aðilinn.
,,Mér finnst Toddi vera að mæta í viðtöl bara andlega búinn á því,“ sagði Jóhann Skúli Jónsson í þættinum um þjálfara Stjörnunnar, Þorvald Örlygsson.
Hrafnkell Freyr Ágústsson tók í svipaðan streng.
,,Algjörlega, hann virkar eins og hann nenni þessu ekki neitt. Það er svolítið þannig en það hefur reyndar verið þannig oft áður þó hann hafi verið að vinna leiki.“
