Einn leikur fór fram í Lengjudeild karla á föstudag. ÍBV og Kórdrengir gerðu þá jafntefli í hörkuleik í Eyjum. Gunnlaugur Fannar Guðmundsson, miðvörður Kórdrengja, fékk beint rautt spjald eftir handalögmál á 13. mínútu. Þrátt fyrir það komust gestirnir yfir eftir rúman hálftíma leik. Þá skoraði Þórir Rafn Þórisson. Staðan í hálfleik var 0-1.

Tíu leikmenn Kórdrengja tvöfölduðu forystu sína í upphafi seinni hálfleiks þegar Arnleifur Hjörleifsson skoraði frábært mark með skoti af löngu færi. Felix Örn Friðriksson minkaði muninn fyrir heimamenn á 60. mínútu. Aðeins tveimur mínútum síðar var Sito svo búinn að jafna fyrir þá. Hvorugu liðinu tókst þó að finna sigurmark. Lokatölur 2-2.

Rætt var um leikinn í markaþætti Lengjudeildarinnar í gær. „Það er mjög góð uppskera, ég held að þeir verði sáttir ef þeir halda sér við toppbaráttuna framan af sumri,“ sagði Hrafnkell Freyr Ágústsson um byrjun Kórdrengja sem eru með átta stig eftir fimm umferðir.

Halldór Páll Geirsson gerði hræðileg mistök í fyrra marki Kórdrengja sem Þórir Rafn Þórisson ungur sóknarmaður Kórdrengja skoraði. „Þetta er strákur sem að kemur frá Víkingi, hafði spilað einn leik þar árið 2019 í meistaraflokki. Hann er virkilega sprækur, góður að ógna fyrir innan lína. Vinnusamur og hættulegur, er að bæta sig hratt,“ sagði Hrafnkell um framherjann unga.

Atvikið má sjá hér að neðan.