Andros Townsend, leikmaður Crystal Palace, vill sjá fjölmiðla og stuðningsmenn á Englandi styðja við bakið á landsliðinu sínu í stað þess að kvarta og kveina.
Enskir fjölmiðlar geta verið ansi harðir við landslið sitt og verið fljótir að snúa baki við þeim þegar illa gengur. Í kjölfarið fylgir almenningur oft með.
Á HM 2018 var þó annað uppi á teningnum. Almenn samheldni virtist ríkja á Englandi. Á EM sem nú stendur yfir virðist fólk hafa farið í gamla farið að miklu leiti. Gareth Southgate, landsliðsþjálfari, er til að mynda mikið gagnrýndur fyrir liðsval. Þá hefur sóknarleikur liðsins ekki verið neitt til að hrópa húrra fyrir.
Townsend vill sjá það sama uppi á teningnum á meðan EM stendur yfir og var á HM fyrir þremur árum.
,,Árið 2018 studdu fjölmiðlar og stuðningsmenn við bakið á liðinu og við komumst í undanúrslit vegna þess! Það var ótrúlegt sumar. Reynum að endurskapa það! Standið við bakið á strákunum og gerum þjóðina stolta,“ sagði Townsend við talkSPORT.
England er í góðum málum í D-riðli Evrópumótsins. Þeir eru með 4 stig, ásamt Tékkum, fyrir lokaumferðina. Króatar og Skotar eru með 1 stig. England og Tékkland mætast innbyrðis á morgun.