Íslenska kvennalandsliðið tók á móti því írska í vináttulandsleik sem var að ljúka. Íslenska liðið sigraði eftir að hafa skorað þrjú mörk í fyrri hálfleik.

Ísland komst yfir strax á 11. mínútu þegar Agla María Albertsdóttir skoraði eftir sendingu frá Glódísi Perlu Viggósdóttur.

Gunnhildur Yrsa Jónsdóttir bætti við marki stuttu síðar. Þar átti Agla María einmitt stoðsendinguna. Hún skallaði boltann á fjær eftir fyrirgjöf þar sem Gunnhildur kláraði.

Um fimm mínútum fyrir leikhlé komst Ísland í 3-0. Dagný Brynjarsdóttir skoraði þá er hún fylgdi eftir skoti Alexöndru Jóhannsdóttur. Ísland fór með góða forystu inn í hálfleik eftir flotta frammistöðu.

Írland minnkaði muninn snemma í seinni hálfleik. Þá skoraði Heather Payne. Þeim tókst svo að skora annað mark seint í leiknum. Þar var að verki Amber Barrett.

Lokatölur leiksins urðu 3-2 fyrir Ísland. Liðin mætast aftur, í vináttulandsleik einnig, á þriðjudag.