Manchester United hyggst bjóða Paul Pogba, miðjumanni félagsins ofurlaun til þess að halda honum hjá félaginu næstu árin. Núverandi samningur Pogba hjá Manchester United rennur út á næsta ári.
Talið er að Manchester United muni bjóða Pogba 400.000 pund í vikulaun, það jafngildir rétt tæpum 70 milljónum íslenskra króna. Forráðamenn félagsins óttast að missa Pogba á frjálsri sölu á næsta ári og munu því þurfa að bjóða vel til að heilla leikmanninn.
Með þessu yrði Pogba launahæsti leikmaður félagsins en óvíst er hvað hann mun gera. Talið er að Real Madrid hafi mikinn áhuga á að fá þennan 28 ára gamla miðjumann til liðs við sig.
Pogba var á mála hjá Manchester United á sínum tíma áður en hann gekk til liðs við Juventus árið 2012. Hann samdi síðan aftur við Manchester United árið 2016 og hefur verið á Old Trafford síðan þá.
Pogba á að baki 201 leik fyrir Manchester United þar sem hann hefur skorað 38 mörk og gefið 40 stoðsendingar. Hann hefur verið í lykilhlutverki hjá liðinu á yfirstandandi tímabili en Manchester United situr í 2. sæti ensku úrvalsdeildarinnar um þessar mundir.
Enski boltinn á 433 er í boði 
