Arnar Hallsson þjálfari ÍR í þriðju efstu deild karla á Íslandi sendir væna sneið á Þórólf Guðnason sóttvarnalækni og Svandísi Svavarsdóttur, heilbrigðisráðherra. Hann segir ekkert samræmi í reglum er varðar takmarkanir á COVID-19.
Íþróttahreyfingin hefur lengi vel kvartað undan reglunum en Arnar lætur í sér heyra í viðtali við Fótbolta.net.
Arnar segist vona að regluverkið í sumar breytist ekki er kemur að því að banna íþróttir. „Ég vona innilega að mótið geti spilast samkvæmt núverandi leikjadagskrá og ytri aðstæður hafi ekki áhrif á mótið. Þá vona ég að áhorfendur verði leyfðir því það hljóta allir að sjá hversu kjánalegar reglurnar eru,“ sagði Arnar í viðtalinu við Fótbolta.net.
Arnar er ósáttur með það að aðeins 100 manns geti komið í hólf á íþróttavelli og að sætin þurfi að vera númeruð. Þetta kemur fram í regluverki Svandísar og Þórólfs.
„Fólk má vera á sýningum í lokuðum rýmum en má ekki sitja eða standa úti séu sætin ekki merkt á sama tíma er búin að vera útihátíð alla daga í rúman mánuð kringum gosstöðvarnar. Samhengið er nákvæmlega ekkert og það hefur verið pínlegt að fylgjast með íþróttahreyfingunni koma þeim skilaboðum áleiðis.“