Þrír nýir leikmenn Kórdrengja gerðust sekir um að brjóta reglur í sóttkví í gær. Um er að ræða þrjá breska leikmenn sem gengu í raðir félagsins á dögunum. RÚV.is segir frá.

Kórdrengir sömdu við Nathan Dale, Conner Rennison og Connor Simpson sem áttu að vera í sóttkví fram eftir viku.

Þeir ákváðu því að fara út að hlaupa en hafi gert þau mistök að fara inn á knattspyrnuvöll og sparka í bolta. „Þeir eru mjög leiðir yfir þessu og finnst þetta mjög leiðinlegt,“ segir Davíð Smári Lamude þjálfari Kórdrengja við RÚV.

Lögreglan á höfuðborgarsvæðinu hafði afskipti af mönnunum sem voru að leika sér í fótbolta en Davíð segir við RÚV að þeir haldi til á hóteli þangað til sóttkví þeirra er á enda.

Kórdrengir hafa vakið mikla athygli í íslenskum knattspyrnuheimi en liðið hefur farið upp um þrjár deildir á þremur árum og leikur í Lengjudeildinni næsta sumar.