Kormákur/Hvöt hefur ráðið Tryggva Guðmundsson markahæsta leikmann í sögu efstu deildar á Íslandi til starfa . Hann skrifaði undir samning sinn í vikunni. Tryggva þarf ekki að kynna fyrir knattspyrnuáhugafólki en hann átti afar farsælan feril hér á landi með ÍBV, KR og FH. Hann náði góðum árangri erlendis og spilaði fjölda landsleikja.

Tryggvi hefur ágætis reynslu af þjálfun en hann var um tíma aðstoðarþjálfari ÍBV og stýrði svo Vængjum Júpíters í 3 deild karla.

„Líklega besti leikmaður efstu deildar, einstakur leikmaður,“ sagði Hjörvar Hafliðason þegar málið var rætt í Dr. Football hlaðvarpsþættinum í dag.

Hrafnkell Freyr Ágústsson segir að Tryggvi hafi ýmislegt hafa fram að færa í þjálfun. „Mér fannst hann virka fínn þjálfari hjá Vængjum Júpíters, það var ástríða í honum. Hann var næstum því farinn upp.“

Kristján Óli Sigurðsson var í þættinum en hann var áður þjálfari Hvatar sem nú er í samstarfi við Kormák.

„Ég þekki það ekki nógu vel hvernig þjálfari hann er, þetta er jarðsprengjusvæði. Þetta er 4 deild, fimmta efsta deild. Ég var þarna þá vorum við í annari deild, þá náðist besti árangri félagsins frá uppafi. Ég kom liðinu í form, ef stjórinn er í formi þá geta hinir ekki verið í neinu bulli. Þetta voru bara aurarnir,“ sagði Kristján sem var rekinn frá Hvöt sumarið 2008.

„Vonandi stendur hann sig vel,“ sagði Kristján um innkomu Tryggva á Blönduós, hans heimabæ.