Íslendingur á þrítugsaldri mætti vopnaður byssu í apótek í Amsterdam í febrúar á síðasta ári. Um var að ræða Sigurð Gísla Snorrason, leikmann Þróttar í Vogum. Sigurður tjáði sig um atvikið í hlaðvarpsþættinum FantasyGandalf.
Sigurður Gísli var píndur til að fara í apótekið vopnaður byssu. Sigurður lagði byssuna á borðið og óskað eftir hjálp en hann hafði verið frelsissviptur af mönnum í borginni. Sigurður Gísli var á vondum stað í lífinu en í þættinum ræðir hann hvernig hann leiddist út á þessa braut lífsins. „Þetta byrjar svona seint árið 2015, ég veit ekki af hverju. Ég var rosa spenntur eitthvað, þetta er svo fljótt að vinda upp á sig,“ segir Sigurður Gísli við FantastyGandalf um neysluna sína.
Sigurður var virkilega efnilegur knattspyrnumaður og var ungur að árum byrjaður að spila með FH. Hann flakkaði síðan á milli liða en er í dag með Þrótti Vogum og var öflugur síðasta sumar.
„Ég var spenntur fyrir því að prófa þetta, ég var mikið í póker sem getur verið slæmur félagsskapur. Ég get verið í öllum vinahópum, ég geri ekki mikið upp á milli fólks,“ segir Sigurður um upphaf sitt á neyslunni.
Í gær var eitt ár frá því að Sigurður hafði farið vopnaður inn í apótekið. Hann hefur aldrei heyrt frá mönnunum sem skipuðu honum að ræna apótekið. „Það er ár núna 23 febrúar, ég skuldaði þetta aldrei. Það er mjög erfitt að tala um þetta, þeir eru ekkert að leita að mér. Ég fer þarna inn og bið um hjálp, það var hringt á lögregluna og ég hef aldrei séð þessa gæa aftur og hitti þá vonandi aldrei aftur.“
Sigurður hefur þurft að vinna úr sínum málum og hefur verið á beinu brautinni frá atvikinu í Amsterdam. Sigurður verður 26 ára í mars. „Ég hef þurft að fara að vinna úr þessu, þetta var eftir á það besta sem gerðist fyrir mig. Ég var ekkert á leiðinni að snúa blaðinu við, svo gerist þetta og breytir lífi mínu.“
Sigurði hefur gengið vel á lífsins leið eftir atvikið, hann fór í meðferð á Íslandi. „Þegar COVID var þá var þetta miklu erfiðara, þegar ég var ekki að mæta á neinar æfingar þá var ég mikið að mæta á fundi.“
Sigurður segir að það sé erfitt að losna úr neyslu, atvikið í Amsterdam vakti hans til lífsins. „Það er rosalega erfitt að hætta. Sumir þurfa að lenda í einhverju smá til að hætta þessu, ég þurfti eitthvað aðeins meira.“
„Það er geggjað að þurfa ekki að vakna og eina sem maður pælir í að redda sér næsta skammti.“
