Boris Johnson, forsætisráðherra Bretlands, opinberaði það í dag að allt að 10.000 áhorfendur verða leyfðir á íþróttaviðburðum í Bretlandi frá 17. maí næstkomandi.

Það hversu mörgum áhorfendum verður hleypt á íþróttaviðburði fer eftir stærð vallarins en þeir leikvangar sem taka fleiri en 16.000 manns í sæti geta tekið á móti 10.000 áhorfendum.

Covid-19 heimsfaraldurinn hefur séð til þess að lítið sem ekkert hefur verið af áhorfendum á kappleikjum í Bretlandi undanfarið ár en nú miða áætlanir bresku ríkisstjórnarinnar að áhorfendur verði leyfðir á kappleikjum, til að mynda í ensku úrvalsdeildinni.

Útgöngubann er nú í gildi í Bretlandi en áætlanir bresku ríkisstjórnarinnar fela í sér fjögur skref afléttinga á samkomutakmörkunum og sóttvarnaraðgerðum.

Gangi þessar áætlanir eftir gætu lið í ensku úrvalsdeildinni tekið á móti allt að 10.000 áhorfendum á leiki í síðustu umferð deildarinnar og þetta opnar einnig fyrir möguleika á áhorfendum á þeim leikjum Evrópumóts landsliða sem leiknir verða í Englandi næsta sumar.

Þessar áætlanir eru að sjálfsögðu háðar því hvernig Bretum tekst að halda Covid-19 veirunni í skefjum og því þarf að bíða og sjá hvort þær geti gengið eftir.