Oliver Stefánsson 19 ára varnarmaður Norrköping er á leið á láni til ÍA. Kristján Óli Sigurðsson sagði fyrst frá þessu í hlaðvarpsþættinum Þungavigtin í dag.
Oliver ólst upp hjá ÍA en var árið 2019 seldur til Norrköping þar sem hann hefur verið síðan. Oliver hefur verið virkilega óheppin með meiðsli í gegnum tíðina.
Þá hefur hann verið frá undanfarna mánuði eftir að blóðtappi fannst í öxl hans. Faðir hans er Stefán Þórðarson fyrrum landsliðsmaður í knattspyrnu og móðir hans, Magnea Guðlaugsdóttir er fyrrverandi landsliðskona og núverandi þjálfari meistaraflokks kvenna hjá ÍA.
„Það er mjög líklegt, hann er að koma til baka og byrja að æfa með okkur eftir áramót,“ sagði Jóhannes Karl Guðjónsson þjálfari ÍA í samtali við 433.is í dag og staðfesti þar með fréttir Kristjáns úr Þungavigtinni.
Oliver er samkvæmt Jóhannesi á fínni leið í endurkomu sinni og Skagamenn ætla að aðstoða hann á þeirri vegferð. „Við ætlum að hjálpa honum að koma sér í stand, hann er á ágætis leið. VIð ætlum að reyna að hjálpa honum í gang, þetta snýst um það að geta hjálpað honum að komast í stand til að spila fótbolta.“
Skagamenn ætla að styrkja lið sitt meira og skoða markaðinn. „Við ætlium að styrkja okkur og sækja 2-3 öfluga leikmenn,“ sagði Jóhannes um stöðu mála.
