Ryan Babel, fyrrum leikmaður enska úrvalsdeildarliðsins Liverpool, reynir nú fyrir sér á nýjum slóðum. Babel hefur nú gefið út ævisögu sína sem birtist í formi rappplötu.

Babel hafði reynt fyrir sér í rappinu á meðan á knattspyrnuferlinum stóð en sá fljótlega að það yrði illvænleg blanda þar sem að knattspyrnudraumurinn tók of mikinn tíma. Hann setti því á laggirnar útgáfufyrirtæki 22 ára gamall og tók einstaka sinnum þátt í lögum hjá öðrum röppurum.

Nýjasta plata hans, sem ber nafnið The Autobiography -Chapter 1, kom út á dögunum. Á plötunni rappar hann meðal annars um samband sitt og Rafa Benitez, fyrrum knattspyrnustjóra Liverpool sem og hvernig Louis van Gaal, hafði ekki trú á honum til þess að spila með hollenska landsliðinu á sínum tíma.

Hugmyndin að því að gera plötu kom þegar að Babel var spurður út í það í viðtali hjá The Guardian hvort hann ætlaði sér að gefa út ævisögu. Í kjölfarið skall á kórónuveirufaraldur í heiminum, knattspyrnuæfingar voru settar á ís og fljótlega hafði Babel yfir nægum frítíma að skipa.

,,Mér finnst það náttúrulegasta leiðin að miðla sögu minni í gegnum tónlist. Þess vegna segi ég frá mismunandi tímabilum lífs míns í þessum átta lögum sem birtast á plötunni,“ segir Babel um plötu sína The Autobiography – Chapter 1, sem gefur til kynna að vænta má fleirri platna frá knattspyrnumanninum og rapparanum Ryan Babel.

Hægt er að finna plötuna á streymisveitunni Spotify:

Enski boltinn á 433 er í boði