Sigurjón Magnús Egilsson, ritstjóri Miðjunnar.is kemur Eiði Smára Guðjohnsen til varnar á vefsvæði sínu og gagnrýnir vinnubrögð Knattspyrnusambands Íslands í máli hans. Eiður Smári hefur lokið störfum sem aðstoðarþjálfari landsliðsins.
Eiður Smári naut ekki lengur stuðnings hjá meirihluta stjórnar KSÍ og var því ákveðið að binda enda á samstarfið. Upp kom atvik í ferðalagi Norður-Makedóníu sem ekki allir voru sáttir við.
Sigurjón segir þetta kaldar kveðjur til Eiðs Smára sem er að flestra mati besti knattspyrnumaður í sögu Íslands. „Enginn fótboltamaður íslenskur hefur unnið eins mikið og stórt og Eiður Smári. Engum hefur tekist að skýra út leikkerfi og spil einstakra liða fyrir okkur og Eiður Smári,“ skrifar Sigurjón í pistli sínum á Miðjunni og heldur svo áfram.
„Það er óásættanlegt að KSÍ hafni honum. Eiður Smári er breyskur maður. Eins og við flest erum. Miðað við frásagnir gerði hann ekkert það, í hófi Knattspyrnusambandsins, sem á kosta brottrekstur.“
Eiður átti magnaðan feril sem leikmaður bæði á Englandi og Spáni.
„Munum þegar Eiður Smári lék með Chelsea og Barcelona kom hann ítrekað til að spila með landsliðinu. Hvert sem gengi landsliðsins var mætti Eiður Smári. Það er því með ólíkindum að þegar Eiði Smára er sagt upp störfum skuli það gert af Knattspyrnusambandi Íslands.“
Sigurjón segir að KSÍ hafi frekar átt að styðja við Eið Smára frekar en að losa hann úr starfi. „Nær væri að styðja Eið Smára þarfnist hann aðstoðar. Hann á það skilið. Heldur þveröfugt.“