Karim Benzema, leikmaður Real Madrid og franska landsliðsins í knattspyrnu, hefur verið fundinn sekur og dæmdur í eins árs skilorðsbundið fangelsi fyrir að hafa reynt að kúga fé frá fyrrum samherja sínum í franska landsliðinu, Mathieu Valbuena, með því að hóta því að birta kynlífsmyndband af Valbuena.
Auk fangelsisdómsins hlýtur Benzema 75 þúsund evra sekt en það jafngildir rúmum ellefu milljónum íslenskra króna. Málið teygir anga sína aftur til ársins 2015.
Allt frá því að Benzema var bendlaður við málið hefur lögfræðingateymi hans reynt að hreinsa nafn hans með því að segja að hans aðild sé byggð á misskilningi. Hann hafi í raun verið að reyna hjálpa Valbuena.
Benzema og Valbuena eru fyrrum liðsfélagar í franska landsliðinu. „Ég vildi bara að hann (Valbuena) vissi af því að myndbandinu hefði verið lekið og hjálpa honum vegna þess að hann hafði hjálpað mér áður,“ hefur Benzema látið hafa eftir sér í viðtali um málið.
Þegar málið komst upp á sínum tíma var Benzema settur í bann hjá franska landsliðinu, bann sem entist í sex ár eða alveg þangað til að hann var valinn í landsliðshóp Frakklands fyrir Evrópumótið sem fram fór síðasta sumar.