Ómar Smárason, deildarstjóri samskiptadeildar hjá Knattspyrnusambandi Íslands segir ákvörðun um að nýta uppsagnarákvæði í samningi Eiðs Smára Guðjohnsen, fyrrum aðstoðarlandsliðsþjálfara íslenska karlalandsliðsins, snúa að persónulegum málefnum Eiðs Smára.
,,Við getum svosem ekki farið neitt nánar út í það. Þetta er sameiginleg ákvörðun. Uppsagnarákvæði í samningi Eiðs Smára var virkjað og hann hættir störfum 1. desember næstkomandi,“ sagði Ómar í samtali við 433.is
Endalok Eiðs Smára hjá landsliðinu tengjast gleðskap þar sem leikmenn, þjálfarar og starfslið KSÍ hittist eftir leik í í Norður-Makedóníu fyrr í þessum mánuði. Þetta herma heimildir DV. Liðið lauk þar leik í undankeppni HM og bauð Knattspyrnusambandið í glas.
Ómar var í för með karlalandsliðinu í þessari ferð og segist ekki hafa orðið var við gleðskap. „Menn fengu sér þarna einn tvo bjóra eftir leikinn en annað var það ekki. Flestir fengu sér bara einn til tvö bjóra og fóru svo bara að sofa.“
Fyrir tæpu ári síðan var samið um starfslok við Jón Þór Hauksson, þáverandi þjálfara A-landsliðs kvenna. Liðið hafði nýverið tryggt sér sæti á Evrópumótinu sem fer fram á næsta ári eftir sigur á Ungverjum. Knattspyrnusambandið bauð þá í glas eftir frábært afrek landsliðsins en eitthvað fór úr böndunum. Var Jóni gert að hætta skömmu síðar.
Aðspurður að því hvort komið sé að þeim tímapunkti að KSÍ taki fyrir það að áfengi sé haft um hönd í landsliðsverkefnum, segir Ómar að KSÍ hafi ekki áhyggjur af þessum málum.
„Við höfum ekki áhyggjur af áfengi í tengslum við landsliðin almennt. Það er ekki óalgengt að menn setjist niður eftir leikjatörn, sumir fá sér einn eða tvo drykki, aðrir ekki og svo fara menn bara að sofa. Við höfum ekki áhyggjur af þessu almennt.“
Yfirlýsing frá KSÍ um starfslok Eiðs Smára birtist laust fyrir miðnætti í gærkvöldi. Maraþonfundi KSÍ hafði þá lokið og niðurstaðan varð sú að Eiður Smári myndi láta af störfum.
„Það var stjórnarfundur hjá KSÍ í gær sem dróst á langinn og þegar að stjórnarfundi er lokið var bara farið í að ganga frá þessum málum og þau klárast þarna um ellefu fyrir miðnætti og þá var bara eftir að láta þá aðila vita sem við vildum láta vita af þessu áður en við sendum þetta frá okkur.“
Arnar Þór og Eiður Smári hafa myndað þjálfarateymi hjá u-21 árs landsliði Íslands sem og hjá A-landsliði karla. Aðspurður að því hvort staða Arnars Þórs sem landsliðsþjálfara sé einnig til skoðunar segir Ómar það ekki vera svo.
„Arnar er bara með gildan samning við KSÍ og það hefur engin ákvörðun verið tekin um breytingar á honum. Þessi ákvörðun snýr bara að Eiði Smára og engin ákvörðun tekin um Arnar hvað þetta varðar.“
Er leit að nýjum aðstoðarmanni Arnars Þórs hafin?
„Nei, þetta er bara svo nýskeð en við munum hefja leit við fyrsta tækifæri. Það hefur bara sinn gang og vonandi náum við að vinna það verkefni hratt og örugglega. Það er að segja að finna rétta þjálfarann til þess að vinna með Arnari.“
Var þetta sameiginleg niðurstaða allra aðila sem komu að ákvörðuninni um að nýta uppsagnarákvæðið í samningi Eiðs Smára?
„Já eins og fram kemur í tilkynningunni er þetta sameiginleg niðurstaða og að henni er komist í eins miklu bróðerni og hægt er,“ sagði Ómar Smárason, deildarstjóri samskiptadeildar KSÍ í samtali við 433.is
