,,Það er synd að tapa þessum leik. Ég er ótrúlega stoltur af þessum árangri. Þetta er ótrúlega stórt fyrir mig og mína fjölskyldu,“ sagði Birkir Bjarnason við RÚV eftir að hafa bætt landsleikjametið yfir flesta A-landsleiki í kvöld. Ísland mætti þá Norður-Makedóníu og tapaði 3-1.
Birkir var að leika sinn 105. A-landsleik og tók fram úr Rúnari Kristinssyni.
Undanriðli Íslands er nú lokið og hafnar liðið í fimmta sæti. Norður-Makedónar eru á leið í umspil um sæti í lokakeppni HM 2022 í Katar.
Ezgjan Alioski kom heimamönnum yfir á 7. mínútu í kvöld. Jón Dagur Þorsteinsson jafnaði fyrir Ísland á 55. mínútu. Tíu mínútum síðar komst N-Makedónía aftur yfir með marki frá Eljif Elmas.
Ísak Bergmann Jóhannesson var rekinn af velli með sitt annað gula spjald á 79. mínútu. Heimamenn gengu á lagið og innsiglaði Elmas 3-1 sigur á 87. mínútu.
,,Það var margt sem við getum bætt í fyrri hálfleik. Við vorum kannski ekki ánægðir með það en við vorum þéttir og reyndum að vinna í því. Mér fannst við koma út í seinni hálfleik og gera mun betur og spilum hörku seinni hálfleik,“ sagði Birkir. Hann sagði jafnramt að Norður-Makedónía væri ekki betra lið en Ísland.
,,Nei, þetta er lið sem er búið að spila ótrúlega lengi saman Við erum með rosalega mikið af nýjum leikmönnum. Við setjum þetta í reynslubankann og höldum áfram að þróa okkar leik“
Loks staðfesti Birkir að hann myndi halda áfram að leika með landsliðinu.
,,Ég er ekki að fara að hætta, ég er ungur ennþá.“