Valur og Hannes Þór Halldórsson sömdu um starfsflok í gær. Besti markvörður í sögu Íslands kveður Hlíðarenda.
Á Twitter síðu Vals í gær var tilkynnt að Valur hefði rekið Hannes, var það fjarri sannleikanum. Forráðamenn félagsins voru fljótir að biðjast afsökunar og sjálfboðaliðum var kennt um verknaðinn.
Blaðamanni DV bárust ítrekaðar ábendingar um að umræddur sjálfboðaliði væri Ragnar Vignir sem er virkur í starfi félagsins. Ábendingarnar bárust einnig til Ragnars sem var fljótur til og sendi stuðningsmönnum félagsins skilaboð.
„Af gefnu tilefni þá vil ég taka skýrt fram að þó að ég sé að sinna samfélagsmiðla störfum fyrir Val þá setti ég ekki „Rekinn“ mynd af Hannesi markmanni á netið,“ skrifar Ragnar Vignir í færslu í Facebook hóp stuðningsmanna Vals.
Ragnar sem er duglegur að hjálpa félaginu sínu og sér um samfélagsmiðla að einhverju leyti. „Mín verkefni fyrir Val eru afmörkuð, og lesin yfir fyrir birtingu,“ skrifar Ragnar.
Ragnar vill taka af allan vafa um að það var ekki hann að verki sem var með misheppnaðan einkahúmor. „Hef ég fengið nokkrar fyrirspurnir þess efnis og vil taka allan vafa af um málið,“ segir Ragnar í spjallhópi Valsmanna.
Eftir stendur stóra spurningin um hver ákvað að gera lítið úr besta markverði Íslandssögunnar. Sjálfboðaliðinn skammast sín úti í horni en enginn veit hver það er.