Arnar Gunnlaugsson, þjálfari Íslandsmeistara Víkings, er einn af sérfræðingum RÚV fyrir landsleik Íslands og Rúmeníu í undankeppni HM karla í kvöld.

Sveinn Aron Guðjohnsen leiðir framlínu Íslands í leiknum. Arnar hrósaði honum fyrir leik.

,,Hann lítur betur út. Barnafitan er aðeins farin af honum og hann virkar eins og hann sé aðeins að taka til í sínum málum,“ sagði Arnar á RÚV.

,,Knattspyrnuhæfileikarnir eru ótvíræðir. Holningin á honum í gegnum tíðina hefur ekki heillað mig en hann hefur verulega tekið sig á.“

Hinn 23 ára gamli Sveinn Aron er leikmaður Elfsborg í sænsku úrvalsdeildinni. Hann kom til liðsins á þessu ári og hefur leikið átta leiki. Í þessum leikjum hefur framherjinn gert þrjú mörk.

Ísland á ekki tölfræðilegan möguleika á að fara upp úr riðli sínum fyrir leikinn gegn Rúmenum.