Cristiano Ronaldo hefur reynt sitt besta til að þjappa hópi Manchester United nú þegar allt logar stafnana á milli.
Manchester Evening News segir frá en þar kemur fram að Ronaldo hafi beðið leikmenn liðsins um að styðja Ole Gunnar Solskjær, stjóra félagsins.
Stjórn félagsins fundaði um stöðu Solskjær í vikunni og skoðaði að reka hann eftir 0-5 tap gegn Liverpool. Solskjær heldur starfinu en Sir Alex Ferguson var einn af þeim úr stjórninni sem ekki vildi reka þann norska.
Ronaldo á að hafa haldið fund með leikmönnum þar sem hann bað þá um að leggja mikla vinnu á sig, sama hvaða skoðun þeir hefðu á Solskjær.
Ensk blöð segja að fjöldi leikmanna hafi misst alla trú á Solskjær en liðið mætir Tottenham á laugardag.