Albert Guðmundsson var í byrjunarliði AZ Alkmaar sem sótti CFR Cluj heim í Sambandsdeild Evrópu í kvöld.
Rúmenska liðið CFR Cluj var í neðsta sæti D-riðils fyrir leikinn í kvöld og varð engin breyting þar á þar sem AZ Alkmaar bar sigur úr býtum með einu marki gegn engu.
Jesper Karlsson skoraði sigurmark hollenska liðsins á 18. mínútu eftir stoðsendingu frá Yukinari Suguwara.
AZ Alkmaar er efst í riðlinum með 7 stig eftir 3 leiki. Cluj situr áfram á botninum með 1 stig.
Albert Guðmundsson fór af velli þegar að níu mínútur voru eftir af venjulegum leiktíma. Rúnar Már Sigurjónsson sat allan tímann á varamannabekk Cluj.
Úrslitin í seinni leikjum kvöldsins í Sambandsdeildinni má sjá hér að neðan.
CFR Cluj 0 – 1 AZ Alkmaar
CSKA Sofia 0 – 1 Zorya
Jablonek 2 – 2 Randers
Partizan 0 – 1 Gent
Basel 3 – 1 Omonia Nicosia
Slovan Bratislava 2 – 0 Lincoln Red Imps
