Óvíst er hvort efnilegasti og besti leikmaður Fylkis, Orri Hrafn Kjartansson yfirgefi félagið nú í vetur. Fylkir féll úr efstu deild karla á síðustu leiktíð og verður í Lengjudeildinni á næsta ári.
Orri Hrafn var á sínu öðru tímabili með Fylki eftir að hafa komið heim úr atvinnumennsku. Hafði hann dvalið hjá hollenska félaginu Heerenveen í nokkur ár.
„Það er einhver áhugi en það hefur ekkert verið meira en það,“ sagði Hrafnkell Helgi Helgason úr stjórn knattspyrnudeildar Fylkis við 433.is í dag.
Samkvæmt heimildum 433.is er Orri Hrafn á óskalista Víkings, Breiðabliks, KR og fleiri liða sem hafa áhuga á að fá hann. Hefur það verið til umræður að lána Orra Hrafn í eitt ár frekar en að selja hann.
„Við eigum eftir að ræða þetta við hann, það er svona fyrsta skrefið í þessu,“ segir Hrafnkell.
Orri er 19 ára gamall en hann var einn af fáum ljósum punktum í leik Fylkis á liðnu tímabili.