Newcastle United hefur beðið stuðningsmenn sína um að vinsamlegast klæðast ekki arabískum eða miðausturlenskum höfuðbúnaði eða klæðnaði á leikjum eftir að sádí-arabískur fjárfestingarsjóður keypti félagið.
Sumir stuðningsmenn félagsins klæddust hefðbundnum kyrtlum og öðrum höfuðbúnaði fyrir leikinn gegn Tottenham á sunnudag, en það var fyrsti leikur liðsins eftir að yfirtakan gekk í gegn.
Newcastle tók fram að nýju eigendurnir hefðu ekki móðgast yfir klæðaburði stuðningsmannanna en að það væri hægt að líta á það sem menningarlega óviðeigandi og að það ýti undir staðalmyndir.
„Newcastle United biður stuðningsmenn sína um að vinsamlegast klæðast ekki hefðbundnum arabískum eða miðausturlenskum höfuðbúnaði á leikjum ef þeir klæðast annars ekki slíkum búnaði.
Enginn af nýju eigendunum móðgaðist á neinn hátt vegna klæðaburðarins og líta það sem jákvætt og velviljað athæfi stuðningsmanna sem kjósa að fagna á þennan hátt. Það er hins vegar mögulegt að aðrir gætu móðgast og hægt er að líta á það sem menningarlega óviðeigandi,“ stóð í yfirlýsingu frá félaginu.
