Samkynhneigður leikmaður í ensku úrvalsdeildinni er hræddur við að opinbera kynhneigð sína og hefur leitað sér sálfræðiaðstoðar til þess að opna sig um sín málefni.

Leikmaðurinn er hræddur við að stuðningsmenn annarra liða í deildinni kunni að nota kynhneigð sína gegn sér. ,,Það er árið 2021 og ég ætti að geta sagt öllum frá því hver ég er,“ segir leikmaðurinn en The Sun birti grein um málið.

,,Það eru stuðningsmenn á pöllunum sem eru enn fastir á árunum í kringum 1980 hvað þetta varðar. Ég vil opna mig um þetta vegna þess að ég er eins og ég er og ég er stoltur af því. En í sannleika sagt verð ég krossfestur,“ segir leikmaðurinn.

Leikmaðurinn er frá Bretlandseyjum og hefur sett sig í samband við Amal Fashanu, frænku Justins Fashanu, fyrrverandi leikmanns Norwich City sem kom út úr skápnum árið 1990 og tók sitt eigið líf árið 1998.

Amal gerði heimildarmynd um frænda sinn og hefur komið af stað góðgerðarsamtökum sem miða að því að tækla homofóbíu og rasisma innan knattspyrnuheimsins.

Í fyrra var greint frá því að tveir leikmenn í ensku úrvalsdeildinni hefðu sagt nánustu vinum og fjölskyldu frá því að þeir væru samkynhneigðir en að þeir væru hræddir við að opinbera það fyrir umheiminum.

,,Árið 2021 er árið sem við höfum verið svo meðvituð um samfélagið sem við lifum og hrærumst í og þetta ætti að vera hinn fullkomni tími fyrir samkynhneigðan atvinnumann í einni bestu deild í heimi að koma út úr skápnum. Raunveruleikinn er hins vegar sá að homofóbía, sérstaklega á netinu er meiri en nokkru sinni áður. Við verðum að verja þessa leikmenn,“ segir Amal Fashanu, kvikmyndagerðarkona og aktívisti.

Enski boltinn á 433 er í boði