Átök brutust út á milli stuðningsmanna ungverska landsliðsins í fótbolta og lögreglunnar á Wembley leikvangnum í leik Englands og Ungverjalands í kvöld. BBC segir frá.

800 áhangendur ungverska landsliðsins ferðuðust til London fyrir leikinn gegn Englandi og sumir þeirra bauluðu er leikmenn Englands krupu á hné í upphafi leiks.

Samkvæmt Metropolitan lögreglunni hófust átökin þegar lögreglan lagði leið sína yfir í áhorfendastúku Ungverjalands eftir að stuðningsmaður liðsins lét rasísk ummæli falla í garð vallarstarfsmanns.

Óeirðalögreglan var kölluð út eftir því sem átökin ágerðust og mætti með kylfur í áhorfendastúkuna. Stuðningsmenn heimaliðsins bauluðu á meðan á slagsmálunum stóð og lögreglumennirnir voru farnir að hörfa undan þegar að loks komst ró á ástandið.

John Murray, lýsandi leiksins á BBC sagði: „Það eru slagsmál í gangi. Þetta er skelfilegt í rauninni. Það virðist vera að senda vallarstarfsmennina burt. Tugir stuðningsmanna Ungverjalands virðast vera að neyða þá til að hörfa. Þetta eru alvöru átök. Það er ekkert að róast. Þetta eru alvöru slagsmál. Þetta eru áhyggjufullar svipmyndir,“ sagði Murray.

Stuðningsmenn Ungverjalands kveiktu síðar á blysum þegar liðið komst í forystu með marki úr vítaspyrnu.

„Við vitum af atviki sem átti sér stað í útivallarstúkunni í leik kvöldsins á undankeppni HM 2022. Við munum rannsaka málið og gefa skýrslu til FIFA,“ sagði í yfirlýsingu frá enska knattspyrnusambandinu.