KSÍ hefur ráðið Þorstein Halldórsson sem þjálfara A landsliðs kvenna og hefur hann þegar hafið störf. KSÍ hefur leitað að nýjum þjálfara síðustu vikur.
Jón Þór Hauksson lét af störfum eftir að liðið tryggði sig inn á Evrópumótið 2022 undir lok síðasta árs, trúnaðarbrestur var á milli hans og leikmanna liðsins.
Þorsteinn, sem er fæddur árið 1968, er reynslumikill þjálfari með UEFA A þjálfaragráðu. Þorsteinn hafði þjálfað hjá KR í fimm ár þegar hann tók við meistaraflokksliði kvenna hjá Breiðabliki árið 2014, en hafði áður m.a. starfað hjá Þrótti og Haukum. Hann stýrði liði Breiðabliks til Íslandsmeistaratitla árin 2015, 2018 og 2020, og til bikarmeistaratitla árin 2016 og 2018. Liðið komst einnig í 16 liða úrslit Meistaradeildarinnar árið 2019. Þorsteinn á sjálfur að baki yfir 200 leiki, þar af 150 í efstu deild, í meistaraflokki með Þrótti N., KR, FH og Þrótti R. og hefur leikið fyrir U19 og U21 landslið Íslands.
Ásmundur Haraldsson, fyrrum aðstoðarþjálfari A kvenna, verður aðstoðarmaður Þorsteins. Ásmundur var aðstoðarþjálfari A landsliðs kvenna árin 2013 til 2018.
Fyrstu leikir A landsliðs kvenna á árinu 2021 eru þrír leikir á æfingamóti í Frakklandi, en þar mætir liðið Frakklandi, Sviss og Noregi. Undankeppni HM 2023 hefst síðan í haust, en dregið verður í riðla í vor.
Þá verður Ólafur Pétursson áfram markmannsþjálfari liðsins en hann hefur unnið náið með Þorsteini í Kópavoginum.
