„Ég helst ræði þetta ekki, þetta var það mikið svekkelsi,“ segir Arnór Guðjohnsen einn besti knattspyrnumaður í sögu Íslands sem er í skemmtilegu og áhugaverðu viðtali við Jóhann Skúla í Draumaliðinu. Arnór gerir þar upp magnaðan feril sinn og velur sína bestu samherja sína.
Þar ræðir hann atvikið fræga frá árinu 1996 þegar hann og sonur hans, Eiður Smári Guðjohnsen voru saman í íslenska landsliðinu. Um var að ræða fyrsta landsleik Eiðs Smára en hann kom inn fyrir Arnór í leik gegn Eistlandi.
Eiður Smári var 17 ára gamall en búið var að plana að þeir feðgar myndu spila landsleik saman á Íslandi, mánuði síðar. Ekkert varð úr því. Á milli landsleikjanna hafði Eiður farið í verkefni með unglingalandsliði Íslands. Í leik gegn Írlandi meiddist Eiður Smári alvarlega, hann var tæklaður af leikmanni Írlands og öll liðbönd slitnuðu og fóturinn var brotinn við ökkla. Arnór var á síðustu metrum ferilsins og tækifærið til að spila landsleik saman, var farið í vaskinn.
„Auðvitað hefði verið hægt að gera þetta öðruvísi, þetta átti að gerast á heimavelli. Það kemur leikur gegn Makedóníu mánuði eftir leikinn við Eistland, það átti að gera mikið úr þessu. Ég var að fá símhringar frá Japan og Bandaríkjunum, hvort þetta yrði ekki örugglega,“ segir Arnór við Jóhann Skúla þegar hann rifjar upp málið.
20 years ago today this happened… Iceland debut replacing my father!!
Commentator really excited😂 #fatherandson pic.twitter.com/lx0bPDR0pi— Eidur Gudjohnsen (@Eidur22Official) April 24, 2016
Arnór segir að það hafi verið klúður að láta þá feðga ekki spila saman í Eistlandi. „Þetta hefði fengið rosalega athygli. Eftir á að hyggja þá gefst svona tækifæri bara í raun einu sinni, menn hefðu bara átt að keyra á þetta. Gera svo enn meira úr því hér heima.“
Arnór naut þess að vera í verkefni með syni sínum. „Þetta var bara eins og fara í vinnuna samnan, ég fór í hópinn hjá eldri mönnum og hann í yngri hópinn. Þetta var mjög gaman.“
