„Ég hata að vera á bekknum, ég kann ekki vel við það,“ segir Paul Pogba, miðjumaður Manchester United. Hann upplifði talsverða bekkjarsetu í upphafi tímabils hjá Manchester United.
Mino Raiola, umboðsmaður hans steig fram í desember og sagði að Pogba vildi fara sem fyrst félaginu. Síðan þá hefur miðjumaðurinn í raun spilað sinn besta fótbolta lengi.
Pogba virðist vera á leið burt frá United í sumar en hann hefur spilað vel síðustu vikur. „Ég þoli bara ekki að vera á bekknum, ég veit alveg að aðrir leikmenn eiga skilið að spila.“
„Ég er sigurvegari, ég vil bara spila fótbolta. Ég vil hjálpa liðinu, þegar ég er á bekknum og kem ekki við sögu þá get eég ekkert hjálpað. Mér líður illa þá.“
Síðasta ár var erfitt fyrir Pogba sem var lengi meiddur og fékk svo COVID-19 veiruna. „Síðasta ár var mér erfitt, ég var meiddur og fólk vissi ekki hvað ég gekk í gegnum. Ég spilaði meiddur og reyndi mitt besta.“
„Það var skrýtið að koma til baka og vera með nánast nýjan ökkla. Ég reyndi að koma sterkur til baka.“
„Síðan fékk ég COVID, ég var ekki í góðu formi og liðinu gekk ekki vel. Við erum að komast í gott form.“
