Sol Bamba varnarmaður Cardiff hefur greinst með non-Hodgkin’s eitilfrumukrabbamein. Frá þessu greindi félag hans í gær.
Þessi 35 ára varnarmaður hefur nú þegar hafið lyfjameðferð vegna meinsins sem nú hrellir hann. „Það er með sorg í hjarta sem við greinum frá því að Sol Bamba hefur greinst með non-Hodgkin’s eitilfrumukrabbamein,“ sagði í yfirlýsingu Cardiff í gær.
„Með stuðningi félagsins þá hefur Sol nú þegar hafið lyfjameðferð sína.“
Bamba virðist elskaður og dáður af þeim hann spilar með en Aron Einar Gunnarsson, fyrirliði Íslands var samherji Bamba frá 2016 til 2019. Hann sendir vini sínum baráttakveðjur. „Ég stend með þér vinur,“ skrifar Aron Einar á Instagram.
„Bamba er elskaður af liðsfélögum, starfsfólki og stuðningsmönnum Cardiff. Sol hefur hafið baráttuna með jákvæða hugarfar sitt að vopni og verður mikilvægur hluti af Cardiff fjölskyldunni,“ sagði í yfirlýsingu Cardiff.
Bamba hóf feril sinn með PSG en hann hefur einnig spilað með Hibernian, Leicester og Leeds á ferli sínum.
