Breiðablik féll á stærsta prófi sínu í ellefu ár í gær þegar liðið tapaði gegn FH í næst síðustu umferð efstu deildar karla. Eftir að hafa verið á frábæru skriði átti Breiðablik slæman dag í gær, jafntefli hefði dugað liðinu til að halda toppsætinu fyrir lokaumferðina.

Víkingur vann á sama tíma dramatískan sigur á KR og er komið á toppinn, liðið á mjög auðveldan leik gegn Leikni í síðustu umferð. Vonir Breiðabliks eru því litlar sem engar.

„Ég held að spennustigið hafi farið með menn, menn vissu hvað var í húfi og fengu það í andlitið. Það kom skjálfti við það að lenda undir,“ sagði Kristján Óli Sigurðsson þegar hann reyndi að greina slakan leik Breiðabliks.

Árni Vilhjálmsson klikkaði á vítaspyrnu í stöðunni 1-0, dýrt spaug fyrir Blika sem eins og fyrr segir hefðu þegið stigið.

„FH hafði engu að tapa, það er gaman að mæta í partý og skemma. Þegar þér er ekki boðið í partý þá er gaman að mæta og skemma það, þeir gerðu það vel,“ sagði Kristjáns.

„Það var að koma smá augnablik þegar vítið koma, eftir það var þetta tilviljunarkennt. Þetta var stress, þetta er nánast í fyrsta sinn sem allir í liðinu eru í þessari stöðu. Það er ekki þekking, menn verða að halda áfram bara.“

Kristján telur það útilokað að Víkingur misstígi sig á heimavelli gegn Leikni. „Ég sé Víking ekki misstíga sig, Leiknir hefur ekki unnið leik á útivelli. Þeir eru komnir í vetrarfrí,“ sagði Kristján í Dr. Football í gær.