Franski miðjumaðurinn Paul Pogba hefur hafnað nýju samningstilboði frá félagi sínu, Manchester United, ef marka má frétt Mirror.
Núgildandi samningur hins 28 ára gamla Pogba rennur út næsta sumar. Þar sem leikmaðurinn hefur ekki enn skrifað undir nýjan samning hefur hann verið orðaður burt.
Samkvæmt fréttinni var Man Utd tilbúið að hækka laun hans úr 250 þúsund pundum á viku í 350 þúsund pund. Ekki var tekið fram um hversu mörg ár enska félagið vildi framlengja samning hans.
Það kom einnig fram að Paris Saint-Germain fylgdist grannt með stöðu mála hjá Pogba. Félagið er tilbúið að leggja fram tilboð upp á 45 milljónir punda í miðjumanninn. Það gæti reynst freistandi fyrir Man Utd, með það í huga að leikmaðurinn rennur út á samningi eftir ár.
Pogba hefur verið á mála hjá Man Utd frá árinu 2016. Þá kom hann frá Juventus.
