Tómas Þór Þórðarson bauð upp á slúðursögu í hlaðvarpsþættinum Innkastið á Fótbolta.net í gær þess efnis að Kórdrengir hefðu áhuga á Pétri Theódóri Árnasyni, framherja Gróttu.

Hinn 26 ára gamli Pétur hefur verið frábær fyrir Gróttu í Lengjudeildinni á leiktíðinni. Hann hefur skorað 13 mörk í 11 leikjum.

Albert Brynjar Ingason, framherji Kórdrengja, meiddist illa á dögunum og verður lengi frá.

,,Þeir ætla að reyna að leysa hann (Albert) af með Pétri Theódór. Voruði búnir að heyra þetta? Að Kórdrengir hafi hent tilboði upp á nokkrar milljónir króna á Gróttuna,“ sagði Tómas Þór í þættinum.

Hann tók fram að hann hafi heyrt af þessu er hann var áhorfandi á leik Fylkis og KA á dögunum. Það er því ekki endilega um traustar heimildir að ræða.

Nýliðar Kórdrengja eru í toppbaráttu í Lengjudeildinni. Þeir eru í þriðja sæti, 3 stigum á eftir ÍBV í öðru sætinu.