Því er haldið fram í fjölmiðlum í Tyrklandi að Arsenal sé búið að selja Rúnar Alex Rúnarsson til Tyrklands. Kemur fram að Rúnar Alex hafi samþykkt að ganga í raðir Altay Spor þar í landi.
Altay Spor var að tryggja sér sæti í úrvalsdeildinni í Tyrklandi, liðið hafnaði í fimmta sæti næst efstu deildar en vann umspilið um laust sæti.
Rúnar Alex gekk í raðir Arsenal fyrir tæpu ári síðan frá Dijon í Frakklandi og fékk nokkur tækifæri í marki liðsins.
Mirror fjallar um málið og segir að Mikel Arteta sé að breyta um skoðun, hann hafi ekki ætlað að selja Rúnar Alex en virðist ætla að gera. „Mikael Arteta virðist ætla að breyta um skoðun þegar kemur að Rúnari, hann hefur sett hann á sölulista,“ segir í grein Mirror.
„Rúnar heillaði ekki á fyrsta tímabili, spilaði ekki mikið og mest af því var í riðlakeppni Evrópudeildarinnar.“
„Þrátt fyrir að hafa ekki fundið annan kost í markið, þá virðist sem Arteta vilji selja Rúnar í þessum glugga,“ segir í grein Mirror.
Arteta sagði þetta í Febrúar. „Hann leggur mjög mikið á sig og er mjög vel liðinn í búningsklefanum. Hann er góður drengur, hann er mjög hógvær og þarf að halda sig frá sviðsljósinu til að bæta sig.“
„Rúnar vissi hvaða hlutverk hann fengi þegar hann kom hingað. Við vorum með plan fyrir markvarðarstöðuna. Hlutverk Rúnars hefur ekkert breyst.“
