Kai Havertz telur að stuðningsmenn Chelsea hafi gert óraunhæfar kröfur á hann og talið að nýr Cristiano Ronaldo væri á leiðinni til félagsins þegar hann fór frá Bayer Leverkusen til Chelsea síðasta sumar.

Havertz átti erfitt uppdráttar í London og skoraði aðeins eitt mark í fyrstu 23 leikjunum í ensku úrvalsdeildinni.
Þess má geta að Cristiano Ronaldo kom til Manchester United aðeins 18 ára og skoraði sex mörk á sínu fyrsta tímabili.

Tímabilið endaði vel fyrir Havertz en hann skoraði sigurmark Chelsea í úrslitaleik Meistaradeildar Evrópu gegn Manchester City.

„Fólk bjóst við því að ég væri nýr Cristiano Ronaldo. En þetta gerist ekki svona hratt, allt var nýtt fyrir mig og ég spilaði ekki minn besta fótbolta í byrjun,“ sagði Havertz við Suddeutsche Zeitung.

„Þetta var allt önnur pressa en hjá Leverkusen.“

Havertz er nú með þýska landsliðinu á Evrópumótinu í knattspyrnu. Hann telur frammistöðu sína undir lok leiktíðar og sigurinn í Meistaradeildinni hjálpa sér á EM.

„Auðvitað gefur titillinn mér byr undir báða vængi og aukið sjálfstraust. Það þýðir ekki að vinna Meistaradeildina og klúðra svo EM.“