John Terry grátbiður Sky Sports um að kræja sér aftur í sjónvarpsréttinn á Meistaradeildinni, þessa beiðni setti Terry á Instagram í gær.

BT Sport hefur verið með Meistaradeildina frá árinu 2015 í Bretlandi. „Sky Sports þið verðið að ná Meistaradeildinni,“ skrifaði Terry.

Terry var þá að horfa á leik Porto og Chelsea í Meistaradeildinni en einn af þeim sem kom að útsendingu BT Sport er óvinur Terry.

Terry sem er í dag aðstoðarþjálfari Aston Villa þolir ekki Robbie Savage sem var að lýsa leiknum, þeir félagar hafa eldað grátt silfur saman í nokkur ár.

Savage gagnrýndi Terry árið 2015 þegar hann var leikmaður Chelsea og síðan þá hafa þeir reglulega skotið fast á hvorn annan.