Patrice Evra segir að forseti franska knattspyrnusambandsins, Noel Le Graet sé rasisti eftir ummæli sem hann lét falla um þeldökka leikmenn í frönskum fótbolta.
Le Graet sagði að kynþáttafordómar væru ekki til í frönskum fótbolta, hann var að ræða um mál Neymar hjá PSG og Alvaro Gonzalez Marseille. Neymar sakaði Gonzalez um rasisma.
„Þegar dökkur leikmaður skorar, þá fagna allir á vellinum. Það er ekki neinn, hið minnsta mjög lítill rasismi í fótboltanum,“ sagði Le Graet.
Þessi ummæli fara ekki vel í Patrice Evra fyrrum leikmann franska landsliðsins. „Það verður að reka Le Graet úr starfi, hann var að gera í buxurnar þarna,“ sagði Evra um málið.
„Þetta er mjög alvarlegt, ég á ekki nein orð yfir þetta,“ sagði Evra og sagði að þegar Le Graet hafi verið í kringum franska landsliðið hafi alltaf hvítu leikmennirnir verið látnir vera í kringum hann frekar en þeir dökku.
