Harry Maguire lenti í slagsmálum á grísku eyjunni Mykonos í sumar og vakti það mikla athygli, ekki síst hjá enskum götublöðum sem gerðu sér mikinn mat úr óförum Maguire. Hann var dæmdur fyrir að ráðast á lögreglu og einnig fyrir tilraun til þess að múta lögreglunni. Maguire áfrýjaði dómnum en hann sagði í viðtali við BBC að hann hafi óttast um líf sitt í slagsmálunum.
Ole Gunnar Solskjær, þjálfari Manchester United, hefur staðið með Maguire og mun láta hann halda bandinu. Hann viðurkennir þó að hann hafi áhyggjur af hugarástandi fyrirliðans
„Ég þekki Harry, hann er sterkur karakter svo vonandi getur hann hætt að hugsa um þetta. En auðvitað, sem manneskja, þá mun hann hugsa um það sem gerðist í sumar,“ segir Solskjær.
„Burt séð frá því þá þarf maður að sjá hvernig þetta þróast með Harry. Persónulega held ég að hann muni ná að hafa hausinn í boltanum en maður getur ekki spáð fyrir um hvernig fólk bregst við svona áföllum. Hingað til hefur hann þó staðið sig vel á æfingum.“
