Kári Árnason, landsliðsmaður, ræddi við Fótbolta.net í dag um leik KR og Víkings R. um helgina.
Kári fékk að líta beint rautt spjald í 2-0 tapi gegn KR en hann var einn af þremur sem fékk reisupassann.
Bæði Sölvi Geir Ottesen og Halldór Smári Sigurðsson fengu einnig beint rautt spjald og voru þeir dómar umdeildir.
Kári viðurkennir að hans spjald verði ekki tekið til baka en vonast til að hin tvö spjöldin fái ekki að standa.
„Mitt spjald yrði aldrei tekið til baka en hin tvö spjöldin eru það mikið út úr kortinu að það verður að vera hægt að gera eitthvað í þessu,“ sagði Kári við Fótbolta.net.
,,Ég skil þetta ekki. Þetta dómarateymi getur ekki dæmt fleiri leiki í þessari deild. Ég veit ekki hvað gerðist hjá honum greyinu.“
Kári vitnar þar í dómarann Helga Mikael sem dæmdi leikinn en nánar má lesa viðtalið á síðu Fótbolta.net.
