Það fóru fram fjórir leikir í efstu deild kvenna í gær en önnur umferð hófst með miklu fjöri. Breiðablik lagði Selfoss 2-0 á erfiðum útivelli og sigraði Valur lið Þrótt R. með tveimur mörkum gegn einu.
Miklar væntingar voru gerðar til Selfoss fyrir mót en liðið er nú án stiga eftir fyrstu tvær umferðirnar og er sex stigum á eftir toppliðum Breiðabliks og Val.
Selfoss fékk til sín öfluga íslenska leikmenn í bland við öfluga erlenda leikmenn fyrir mótið og kröfurnar á Selfossi eru að liðið berjist um þá titla sem eru í boði. Alfreð Elías Jóhannsson þjálfari liðsins ræddi vandamál liðsins við Vísir.is „Við þurfum að fá fleiri skot á mark og við þurfum að gera betur í föstum leikatriðum, þetta er eitthvað sem að við eigum að gera betur, við erum að fá möguleika til þess en við erum ekki að nýta þá. Við viljum frekar spila bara í gegnum markið í staðin fyrir að láta reyna á markmanninn,“ sagði Alfreð við Vísir.is.
Hann kallar eftir meiri greddu upp við mark andstæðinganna. „Við þurfum bara að vera aðeins graðari og negla þessu inn.“