Líkur eru á að enginn landsliðsfótbolti verði fyrr en á næsta ári vegna kórónuveirunnar. UEFA mun funda eftir helgi og ræða málið.
Samkvæmt fréttum er það í skoðun að blása Þjóðadeildina af, Ísland átti að mæta Englandi, Danmörku og Belgíu í haust.
UEFA skoðar að aflýsa öllum landsleikjum til að gefa deildarkeppnum tækifæri á að klárast.
EM sem fram átti að fara í sumar hefur verið frestað til 2021 og umspilið sem Ísland er í á að fara fram í haust en óvíst er hvenær það verður.
Enska blaðið Mirror fjallar um málið og segir líkur á því að allir landsleikir verði færðir yfir á næsta ár.