„Ég vil þakka AIK fyrir tíma minn hjá félaginu, ég óska félaginu og liðsfélögum góðs gengis á komandi árum,“ segir Kolbeinn Sigþórsson á heimasíðu félagsins þar sem staðfest er að samningi hans við félagið verði rift í lok árs.

Um er að ræða samkomulag beggja aðila en framherjinn knái átti eitt ár eftir af samningi sínum í Svíþjóð.

Ein umferð er eftir í sænsku úrvalsdeildinni en Kolbeinn lék tæpan hálftíma í tapi AIK gegn Kalmar í sænsku úrvalsdeildinni um helgina.

Kolbeinn mun því kveðja félagið eftir síðustu umferðina en hann er að ljúka sínu öðru tímabili hjá félaginu. Kolbeinn kom á frjálsri sölu frá Nantes og hefur ekki fundið sitt besta form í Svíþjóð.

Kolbeinn er þrítugur en hann er markahæsti leikmaður í sögu íslenska landsliðsins ásamt Eiði Smára Guðjohnsen. Hann þarf nú að finna sér nýtt félag en hann hefur í atvinnumennsku verið á mála hjá AZ Alkmaar, Ajax, Nantes, Galatasaray og nú AIK.

„Við getum alveg sagt það að tími hans hjá AIK var ekki eins og allir aðilar hefðu kosið eða vonað. Við höfum náð samkomulagi um að halda í sitthvora áttina. Við óskum Kolbeini góðs gengis í Svíþjóð,“ sagði Henrik Jurelius yfirmaður knattspyrnumála hj´AIK.